Paplajahan 10: Paindikan Dados Sisian Hyang Yesus
(Lukas 14:25-35)
Pakeweh Dados Sisian Hyang Yesus
Ring rahina anu Hyang Yesus sareng anake akeh sedek nuju kota Yerusalema. Ritatkala punika Ida ngajahin anake akeh.
10
25 Kaceritayang mangkin,
akeh anake mamargi nyarengin Hyang Yesus,
lan Ida nyingakin kuri saha ngandika,
26 “Sirake sane pantes dados sisian Tiange?
Nenten tios anake sane bani ngutang bapa,
meme,
somah,
oka,
tur semeton-semetonnyane lanang lan istri,
turmaning bani ngutang angkihane praragan.
27 Anake sane nenten misadya nugtug Tiang kantos padem - sekadi anake sane negen kayu salibb - ipun nenten mresidayang dados sisian Tiange.
28 “Umpamine wenten anak sane jagi ngaryanin bale sane tegeh.
Nentenke ipun jagi malinggih dumun ngitungang penelasne,
napike genep jinahne kaanggen ngaryanin bale punika kantos pragat?
29 Krana yening ipun ngaryanin dasar nanging nenten mresidayang mragatang,
pastika anake akeh sane nyingakin jagi ngedekin ipun.
30 Tur anake akeh mabaos sapuniki,
‘Ipun ngawitin ngaryanin bale sane tegeh,
nanging nenten mresidayang mragatang.’
31 “Umpamine,
wenten raja sane madue tentara dasa tali (10.000) jagi maperang nglawan raja sane madue tentara duang dasa tali (20.000).
Nentenke rajane punika jagi malinggih dumun,
mineh-minehang napike sanggup ipun nglawan musuhe punika?
32 Yening rajane punika nenten sanggup,
pastika ipun jagi ngutus utusan ngidih dame kapining musuhe punika tatkala musuhe kari adoh.
33 “Kenten pada ragane suang-suang,
yening ragane dados murid Tiange,
ragane patut ngutang saluirin arta branane.”
Pageh Dados Sisian Hyang Yesus
34 Raris Hyang Yesus malih ngandika sekadi puniki,
“Uyahe melah.
Nanging yening umpamine uyahe punika dados nyem,
punapike carane kapakehang malih?
35 Uyahe sane nyem nenten maguna krana nenten prasida kadadosang lemekanc utawi nyuburin pategalan.
Melahan kutang kamanten!
Yening makuping,
resepang ja pengajahan Tiange.”